【爆相爆片】搬屋工人霸𨋢被投訴 發爛渣起腳踢女保安
蘋果日報 2018/06/11 08:00
爆相爆片
搬屋搵着啲唔專業嘅公司同工人，有時真係累街坊。噚日（6月10日）鰂魚涌康景花園B座9樓就有住客搬屋，但請番嚟啲搬運工人就好似搬屋大晒咁，霸住部升降機嚟用，仲搬到一袋二袋嘢塞住部𨋢門口，搞到居民無𨋢用，梗係投訴啦。
點知22歲姓鄭女保安員嚟到處理，佢企喺𨋢入面阻上工人搬貨入𨋢，但對方其中一個貌似40幾歲嘅工人竟然發爛渣，起飛腳踢傷呢位弱質纖纖嘅女保安。事後警員接報到場調查，但個涉案工人已經走咗，居民見到睇唔過眼，於是向《蘋果》爆相爆片，一定要追緝兇徒咁話！
事發嘅康景花園B座有三部𨋢，噚日下晝12點左右9樓有人搬屋，搬運工人就喺車場地庫用𨋢將啲搬屋物品搬上樓。據居民講，當時現場一部𨋢整緊封咗，餘下兩部𨋢分開雙、單數樓層，工人搬屋霸咗部單數樓層嘅𨋢嚟用，搞到住喺單數樓層嘅居民都無𨋢用。
從大廈閉路電視片段睇到，當時有兩個搬運工人搬嘢，佢哋將好多袋嘢放喺𨋢門外，其中一個着黑衫嘅工人喺𨋢入面接應，另一個着灰色衫紅褲嘅工人就喺𨋢外面。其間有居民出𨋢，亦都有細路仔，佢哋幾乎出唔到𨋢，但工人都無搬開啲嘢讓開條路。之後着紅褲嗰位工人將啲嘢推入𨋢，佢推完一板車嘢入𨋢塞住，仲想推另一板車嘢。
個女保安於是走入𨋢阻止佢再推貨入𨋢，點知呢位紅褲工人就發爛渣，即時將啲未入𨋢嘅搬屋物品推向女保安，跟住仲一腳伸向女保安，搞到女保安要上白車送去東區醫院治理。涉案嘅搬運工人搬完嘢就已經走咗，警方將案件列作襲擊，暫時無人被捕。
《蘋果》打去問過涉事嘅搬屋公司，對方有個自稱姓黎嘅男人就一味話唔清楚件事，又話唔知邊個工人踢傷女保安喎。不過閉路電視就清楚影到工人個樣囉。
你敢爆，我敢獎！ 即Call《蘋果》24小時爆相爆片熱線 ：63836568
搬屋工人涉嫌踢傷女保安員，警方將案件列作襲擊。