嶺南大學中文系、哈佛大學東亞語言及文明系、復旦大學中文系合辦嘅「當代文學六十年」國際學術研討會噚日舉行，邀請到中、港、台多位著名作家討論六十年來文學作品中嘅歷史、政治，再講到小說中女人同男人折射出嚟嘅時代形象問題，堪稱文壇盛會。
大家唔好以為學術研討會好鬼悶，實情噚日兩場作家論壇好熱鬧，因為有多位名家出席，包括王蒙、北島、黃春明、駱以軍、董橋、陶傑、也斯等。幾百個粉絲慕名而至，熱情fans戴小姐話，一次過見晒咁多個心儀男作家，真係畢生難忘兼好難有第二次，佢形容場面墟冚程度十足台灣少男偶像組合棒棒堂駕到，心情十分興奮咁話。

王蒙匿埋睇《上海寶貝》

香港追星族沉迷偶像好普遍，讀者追捧作家都咁熱情，八方覺得有啲意外。好多人都睇過呢七支名筆嘅作品，聽佢哋講男講女卻好稀罕。王蒙做過文化部長，佢話過去60年，中國大陸嘅小說女角特色係好革命、好強悍，描寫愛情都高度政治化，不過佢自稱對女性認識不深，聲稱67歲先第一次睇足版《金瓶梅》，由於一把年紀怕尷尬，連《上海寶貝》都要匿埋睇。王蒙講到自己咁純情，引得哄堂大笑。

黃春明：不應歧視妓女

黃春明則話自己對女性嘅認識，主要來自嫲嫲，因為由嫲嫲湊大，可能嫲嫲以為細路仔唔識性，經常喺佢面前赤裸上身。其代表作《看海的日子》係有關妓女白梅嘅故事，由於描寫細膩，好多人猜測黃春明可能曾經同妓女有一段情，先可以觀察入微。佢噚日話自己從冇召妓，只係因為以前生活嘅地方有好多呢類女性，所以寫小說時刻劃得較深入，佢認為出賣肉體嘅女性都係為討生活，唔應該受歧視。
噚日聽講座嘅都係愛書人，唔少人都向大作家請教寫好中文之道，北島指現代漢語發展不足100年，仍然好唔成熟，鼓勵大家多創作改進。董橋則話已故作家徐訏曾跟佢講，年輕人唔捱過苦，寫不出好文章，不過家嘅後生仔又唔需要自討苦吃，只要鍾意中文，自然寫得好。
mailto:[email protected]