中央政策組全職顧問練乙錚，因與董班子不合，尤其因為講良心說話，得罪咗頭頭劉兆佳，於是就遭到解聘炒魷，被迫令「提早放假」，白收多四個月人工，然後執包袱走人！
可憐練乙錚本來係科大經濟教授，諗住「書生報國」，首先去咗某知識分子報紙做老總，跟住覺得抱負都重係未能舒展，喺特區政府一小撮混吉人士甜言蜜語之下，以為「加入建制」，可以提出「建設性批評」，點知一入太監大本營，練乙錚從來冇諗過揮劍自宮，入到去重諗住履行正常男性嘅生理功能（睇佢做咗智囊之後，啲鬍鬚重生得咁密就知）：講老實說話，對得住良心，咁又點會唔遭到太監聯手排斥放逐？
練乙錚做咗顧問，重附和倒董，重走去參加六四燭光會。佢又唔學吓劉兆佳，未做「首席顧問」時，夠一樣口窒窒咁刻薄攻擊阿董，一「加入建制」，就口窒窒變咗舔董急先鋒。練乙錚練嚟練去，話之你練琴、練箏、練刀練劍，獨係練少咗一味葵花寶典，咁就遭到清場。