韓國盛事《SBS演藝大賞》噚晚圓滿結束，現年31歲嘅韓國男星李昇基憑節目《家師父一體》撼贏「國民MC」劉在錫、申東燁、白鍾元等人，獲頒當晚最高殊榮嘅大獎，成為史上最年輕嘅大獎得主。

不過賽果就引起網民不滿，認為李昇基未夠資格獲得大獎，質疑大會有造假之嫌，惹來爭議，更有部份激進網民湧到「青瓦台國民請願留言板」，抗議留言寫道「請剝奪李昇基嘅大獎」、「請將大獎頒發給白鍾元」等，不過亦有粉絲力撐李昇基，指《家師父一體》曾連奪41周收視冠軍，所以李昇基都有理由贏得大獎。

隨後韓媒《Starnews》引述電視台相關人員透露，白鍾元喺《SBS演藝大賞》舉行前，已經向製作組講明唔要任何獎項，因為白鍾元認為自己唔係演藝人，成為慶典嘅主角會感到負擔。對於白鍾元事前謝絕獲獎一事，SBS方面回應表示：「目前唔會對此發表官方立場。」

精選韓流，喺晒《娛果》
http://fb.com/appledailyent