當年今日
關於我們

Kary絕不原諒「偷食男」: 兩個人始終要信任

蘋果日報 2014/05/27 06:00

吳雨霏

吳雨霏(Kary)今日喺商台宣傳新碟,佢話原本公司安排下星期去內地宣傳,但因為好多原因而延遲,係咪同近日嘅斬人事件有關?Kary話係安全問題,公司都有啲緊張,所以延到6月尾先去。

會唔會考慮取消內地宣傳?佢話:「我始終想去內地見下歌迷,等安排好啲先。」問佢本身驚唔驚?Kary話:「好難預料,我去咁多次內地工作都Ok,都會有混亂時候,但Ok嘅,公司會比我更緊張。」

問佢會唔會改一改嚟緊內地嘅宣傳形式?佢話可能會改做見面會。會否要求公司加強保安?Kary話都會同公司講下,唔係擔心歌迷做咩,只係怕費事混亂,整傷自己都未定,但本身自己就唔驚,冇所謂。

講到彭順背李心潔偷嗒0靚模,Kary話有睇報道,問佢如果係女方,會唔會原諒?佢話:「我唔知,唔可以代表佢講,如果有細路希望快啲冇事。」

問佢以前有冇男友偷食俾佢發現?佢話慶幸冇,自己亦唔會咁做(指偷食)。

咁如果事件發生喺自己身上,係咪唔會原諒對方?Kary話應該唔會原諒,兩個人始終要信任,有男仔背後咁做,真係幾唔開心;咁如果係結咗婚呢?Kary話所以會諗清楚先結婚,因為拍拖同結婚係兩件事。