中渝置地（1224）食正西部大開發兼二線城市經濟起飛，增值潛力吸引到痹，有得諗。中渝家陣喺主打嘅四川及重慶地區，手頭土儲9100萬平方呎，而呎價成本講緊唔夠200大元。仲要咁睇，呢期同類股莊中（298），出售湖南長沙市地皮權益（300萬平方呎），套現6億銀，賺咗近4億銀。莊中呢次出售，啟示祖國二線城市經濟起飛，資產增值唔比一線城市執輸，而單係地價升值，亦已經肥仔水。至於中渝，食住西部開發兼地區經濟起動，中線增值潛力，勁豐厚。
以中渝中線每方呎增值100蚊，已經額外增值91億銀，保守計中渝每股重秤後NAV上到8.15元，現價2.62元，折讓68%，吸引到爆。呢轉博中渝折讓收窄到50%，中渝價見4.07元，即係現價要翻半番。

莊中短打博升兩成

莊中（298）出售長沙地皮，相當於集團每股變現0.40元，及每股獲利0.26元，莊中現價不過0.54元，地皮入賬，預期PE跌到得番2倍。再講，莊中除咗喺祖國廣州物業發展項目，集團其他非核心投資，賬面值講緊8億銀，即係每股0.52元，潛在變現價值，亦非常豐厚。呢轉短打，係咁意博莊中升20%到0.65元，莊中未有耐上到NAV水位。
錢雋