今日係耶穌受難日，全世界愛好自由嘅人士，唔係講基本法同喬曉陽，而係講緊米路吉遜嗰套《受難曲》。
香港六百萬市民受難只六年幾，今時今日，輪到阿董受難。耶穌尚未被捕受審，門徒伯多祿擦耶穌鞋，佢話會追隨耶穌到底，被耶穌一語踢爆話：雞叫之前，你將會三次唔認我。
今日嘅阿董，早就慘遭伯多祿之類養唔熟嘅親中愛國分子劃清界線。鄔維庸話：董建華經已同港人脫鈎。曾鈺成又講過：民建聯跟住阿董搵食，只有辱，沒有榮。

入咩學校自由選擇
今年受難節，八方大膽估計，全世界只有我哋阿董一個最明白當年耶穌嘅痛苦。未聽見雞叫，以前擁董吻董嘅親中人物，經已多次唔再認我哋阿董，而阿董就好似《受難曲》裏面嘅耶穌咁，七一前俾民主派鞭完背脊，七一後再俾好多港區人大愛國土共鞭心口、吐口水，一身血淋淋，要佢背負特區一切罪孽釘十字架。
當年耶穌孭十字架上路，途中三次跌倒，都有個叫做西門嘅凡人，幫耶穌孭十字架行上髑髏山。現時中方指定特首提交政改報告，並由當奴曾統領政制諮詢小組，唔知阿當奴又肯唔肯好似西門咁，幫我哋特區耶穌基督，齊齊將個民主十字架孭一程？或者，除非天父話：幫我個仔孭十字架，將來必有着數，咁就相信連唐唐、梁英哥都會仆倒埋嚟爭住幫手孭㖭。
復活節，睇《受難曲》，全世界觀眾，都要搵香港人嚟解吓畫。耶教精神，普照全球，睇見耶穌為世人承受罪孽，好令人感動。不過與此同時，特區亦出現咗一股反天主抗基督嘅妖風。特區政府修例，竟以「民主」為藉口，向全港一百幾間天主教學校校董會，加派所謂「家長教師代表」。主教陳日君反對，嚴正指出：呢啲非宗教嘅人士入到嚟，辦學理

陳主教講得啱。教會學校，無上莊嚴由教會全權話事，整埋啲「家長代表」入局，點知呢啲「家長」，係咪維園阿伯？若然啲「土共家長」滲透教會學校行政大權，話要學校宣揚基本法多過讀聖經，要學生洗腦學習「愛國論」，咁不如啲教會學校委任埋曾憲梓做校監咪重好？
教會學校，當然由教會強勢行政主導，教會學校並非壟斷全港教育，若然唔鍾意，想讀少啲聖經，渴望學習多啲基本法，得，可以將啲仔女送入香島、培僑、勞校，冇人監你。等於去UA買張飛入場睇《受難曲》，使唔使由全院聽眾，選一個聽眾代表，走入去放映室，話要加映一段五分鐘東瀛女學生四級AV片，至叫做「睇戲民主化」？呢啲就叫反智。

耶穌都唔係民選嘅
有人在幕後掀起一場政治陰謀蒙蔽愚民，採用嘅手段，叫做「滲沙子，挖牆角」。教會學校，百年來都係香港教育精英火車頭，特區反民主嘅政治勢力，恨得咬牙切齒，一早就搜集罪狀，又話抗拒五星旗，又話唔肯學基本法，將教會學校，視同「港英餘孽」基地。
佢哋又唔照吓塊鏡，中國百年嘅精英人才，邊個唔係由教會培訓？教會校政，要加入「家長」指指點點？答案係No。耶穌亦從來唔係十二門徒一人一票選出嘅，唔鍾意聽道，可以走，轉跟魔鬼。凡天主教及基督教徒，以及愛好民主自由嘅人士，必會明辨是非，知道邊家至係上帝，咁就不枉美國大導演米路吉遜拍《受難曲》嘅一片苦心嘞。


傳真︰2623-9278
電郵︰[email protected]