【樂富】黃日華最近被揭同84歲嘅爸爸黃桂以及50歲嘅繼母劉煥珍關係欠佳，過去幾年冇照顧黃伯，搞到黃伯要靠綜援過活，而近日黃伯因老人病入院，華仔都不聞不問。原來大前日黃伯由伊利沙伯醫院轉咗去樂富嘅香港佛教醫院，前晚記者喺醫院見到黃伯坐喺輪椅，由黃太推入病房，精神狀況唔多好，身體好虛弱無力，黃太扶佢上床都顯得好吃力。
之前有報道話黃伯腳傷、腸塞開刀後搞到肺炎，前日記者問黃太究竟黃伯乜嘢病，但佢唔願多講，只係話：「佢（黃日華）老竇11月病到𠵱家矇查查，佢身體咁糟糕，之前發過燒，認唔到人，差唔多連眼都睜唔開。」

「想見吓仔女」

黃太話華仔自從09年後唔知點解冇探過黃伯，𠵱家黃伯病重，佢只係想華仔做番個孝順仔同其他仔女去醫院見吓個老竇，唔係為咗向華仔攞錢。黃太話：「我從來冇問佢攞過一個仙，你問黃日華，先生搞到咁好唔開心，其實佢想見吓仔女啫，點解搞到咁複雜？我只係想佢早日康復，佢𠵱家病重，但達唔到佢願望，話我有乜陰謀同企圖？點解扯到我身上？乜老竇要見仔女真係咁難咩？」
有指黃伯早年以30幾萬買咗個東頭邨公屋單位，原本間屋係寫黃伯同個女個名，但後來取消咗個女名又加咗黃太個名，所以令到黃伯同班仔女不和，黃太就話：「係加咗我名，但呢啲係我兩公婆嘅事，唔需要同人講。」問會唔會為免關係繼續惡化落去而取消自己個名？黃太話：「都要先生肯，我視錢財如糞土，加我名係先生嘅願望。」
採訪：張俊銘、李志明
攝影：黃文偉、吳耀輝