上周二主打天津港（3382），累升咗10%，跑贏同期恒指及新世代股，整多件平靚正港口物流股大連港（2880），明年預測PE得海嘯期7倍水位，嚟緊日子，食住城鎮化超級利好因素，博中線翻一番係基本動作。
天津港主打油品、汽車、散糧、礦石及糧食碼頭物流業。已經講過，國家開發銀行估計，未來三年，喺城鎮化底下，投融資金高達25萬億銀人仔，阿爺用城鎮化手段，刺激實體經濟，大連港所有瓣數，全部同城鎮化及日後民生必需品，有好大關係，大連港亦係食到應。

估值落後博翻一番

又大連港喺上年相對惡劣環境底下，純利仲keep到14%增長，到6.8億銀人仔，現價（1.77元）係上市以嚟低位咁滯，較2007年8.25元大插八成，PE得9倍單位數。
係咁意當大連港今、明年度EPS增長，只係keep住14%，到0.214港銀及0.244港銀，明年度得番7倍PE。呢個PE水位，同海嘯期差冇幾，兼仲未認真計埋城鎮化威力，大連港已經平到爆。
更吸引係，大連港PB得0.44倍，場內至平。同一個倒模，集團喺上海上市A股（601880）價，上到3蚊港銀，香江H股相對A股大折讓過40%。而大連港H股呢個殘價市值得18億銀，姊妹系錦州港市值95億港銀，係大連港5.3倍。又錦州港PE，係講緊40倍，PB企喺1.4倍，大連港發生乜事？
數咁計，大連港翻一番到3.5元，明年度PE 14倍，PB仲未上到1倍。又大連港2006年上市，炒升咗一陣，適逢2007年股災，長線冇乜蟹貨，而中資股逢十年一大閏，中線少少睇，中資大水一到，大連港隨時放紙鳶，現價升兩倍到5蚊，PE仲未追到2007年時28倍水位。

細價股專家　錢　雋
本欄逢周二、三、五刊出