昨日講到，可以放心食用的新品種不多，大家不妨改變口味試試食穀種、食夾棍或者食自己。今日要提醒讀者，禍從口入，除了瘟豬癌鱔毒魚碰不得之外，下列品種，最好也避之則吉：
一、食碗面反碗底。兩樣都很難鯁，就算沒有孔雀石綠，這樣食法，得罪人多，一樣會死人，勿以身犯險。
二、食西北風。講明方向，是從大西北來的，你還夠膽落肚？唔驚中風？
三、食人唔𦧲骨。食人就算了，那一身骨頭，經過長期食用頭髮豉油、翻渣蓮蓉月、豬潲陳年普洱、大頭娃娃奶粉、工業用染劑醃鳳爪和數之不盡的劣等國貨，毒素儲存在骨髓中，食人唔𦧲渣的話，簡直是玩命。

四、食窮郎。窮郎，不可能是天生，肯定是被上一手吃窮的，沒理由你還執二攤咁蝕底。窮郎等於二手煙，嚴重危害單身女子的健康。
五、食水深。欺山莫欺水，日飲八杯水就要收手，否則自招水腫惡果，搵誰幫你通淋巴瘦身？而我們高價收買的東江水，水質甚曳，淺嘗好即止。
六、食白果。大陸國貨陸續出事，白果遲早爆大鑊（但不會變成爆穀），與其冒險食白果，不如無食。
七、食七。照常理推斷，應該不會食七都有事。但世事無常，生態飄忽，國貨禍延未止，隨時連紅白二事都會領嘢。你迷戀數字的話，可以嘗試其他數目，夠膽可以挑戰九四一三。
八、食神。太婆教落，神只能拜，或者打，怎能食。真是發神經。