賭王二房二家姐，何超鳳向來極少談私人事，樣子向來很惡，「呢個即係點？round定唔round?」為影相而拍的短短幾分鐘工作mode，亦見她嚴肅、處事俐落的一面。

實情，閒談傾計會發現她很easy going，off record會爆自己有時神經緊張，自我保護意識幾強，亦為一對女兒的靚樣感到自豪。「我細個的夢想其實係做老師，但爹哋和家姐話我唔夠威嚴。」愛讀書，何超鳳擁有何家最高學歷，多倫多大學工商管理碩士學位（主修財務）、南加州大學學士學位（主修市場學），計劃有時間再讀一個PhD。

何超鳳自封宅女不貪靚，「我唔貪靚呀，我係有需要先去買衫，我唔係一個特別鍾意逛街的人，行街係消磨時間，同朋友見下面、傾下計，如果真係要買衫，唔係話分咩季節、特別日子，而係睇有咩events要去，你可以話我務實型，又可以話我懶。」年輕時愛色彩花巧，現時就穩陣派，是日開工look：一條Chanel深藍針織裙，「裙最方便，一着就行得，O依家個人穩陣啲，着來着去都係Chanel、Dior、Valentino。」

手錶長戴Apple Watch，何超鳳貪其可計步數及記錄燃燒了幾多卡路里，「因為我係曾經肥過，好彩，個時仲未有記者，哈哈！我十幾歲時，啱啱去美國讀書，唔算係肥，係好大嚿，嗰時又游泳隊又田徑隊，又住寄宿學校啦，我唔鍾意飲水，一日三餐飲牛奶，你諗下幾大鑊，三個月重咗二十磅，接機時，爹哋媽咪都唔認得我。」為減磅試過所有減肥方法，幸運地到廿一、廿二歲，突然回歸正常，「曾經有一個磅數，103磅，o依家年紀大咗，重咗兩三磅咁，都係維持咁上下。」

採訪：林妙萍
攝影：郭賢興
攝錄：林德雄、周樂恒

精選娛聞，喺晒《娛果》
http://fb.com/appledailyent