葡萄牙同智利星期三會喺喀山進行嘅洲際國家盃4強對壘，日前有報道指智利球星維達爾插葡萄牙嘅基斯坦奴朗拿度（C朗）係自以為是（smart a**）嘅人，仲話喺自己眼中C朗並唔存在，認真大口氣。之不過，智利國家隊星期二就為維達爾解話，話事件只係傳媒繙譯錯誤。

智利國家隊嘅新聞秘書華絲歌洛絲（Maria Jose Vasconcelos）同《ESPN》講，話傳媒譯錯咗維達爾講嘅嘢，佢話︰「維達爾喺混合採訪區唯一提到C朗嘅嘅，係當佢哋問佢怕唔怕嗰個「cuco」嘅時候。」維達爾當時嘅答案係話「葡萄牙隊中冇『cuco』」。Cuco喺智利西班牙文嘅意思，係「鬼怪」或者「可怕嘅人」咁解，而喺西班牙文亦可以解釋做「狡猾」或者「奸詐」，根據智利方面嘅解釋，維達爾應該係話葡萄牙隊中冇佢哋值得驚嘅人啦。

不過，德國有報道用咗「Schlaumeier」（聰明人），西班牙有傳媒就用咗「engreido」，呢個字意思可以係「畀人縱壞」、「虛榮」、「傲慢」、「自大」、「狂妄」等等。西班牙《世界體育報》寫呢單新聞條題係「Cristiano Ronaldo is a smart a** ... he doesn't exist to me.」因為繙譯問題，結果就引起咗一場風波！