警方接連充公新舊民主女神像，竟引起坊間一股民主女神熱。既然特區政府容不下民主女神像，大家就各出奇謀，令女神像透過唔同方式「翻生」，所謂一個民主女神像倒下，卻有千千萬萬個女神像起來。有網民仲即刻摷番周星馳電影《賭聖》入面吳君如扮演民主女神嘅片段出嚟，非常搞嘢。

漫畫女神都被刪

民主女神像一日未獲釋，大家惟有自己扮住先，噚日時代廣場就先後出現幾個「民主女神」，考驗時代廣場管理當局同政府部門嘅智慧。網民就話，想扮民主女神，大可參考吳君如當年嘅造型。
本土漫畫家楊學德就畫咗張畫，畫中有個好可愛嘅肥仔拎住個女神像氣球，背後仲有好多人拎住個浮喺半空嘅女神像氣球，場面好壯觀，仲寫住「佢充公，我充氣！」六個字。點知呢幅畫擺上新浪微博，冇耐就同藝人梁詠琪、杜汶澤留言嘅命運一樣，被「河蟹」咗，刪走咗。有網民嬲嬲哋，話諗住貼吳君如扮民主女神段片上去，等內地同胞網民一齊分享，睇吓對方刪得幾多。