【新增動新聞】
【新增影片】
前曼聯中場史高斯日前喺紅魔鬼0:0賽和修咸頓場波之後，批評曼聯中場保羅普巴係「散步帝」，事隔兩日，紅魔鬼領隊摩連奴終於有回應，唔單止喪插「史高斯淨係識批評」，仲燒埋92班其他球員好似加利尼維利、菲臘尼維利同傑斯，話全部人都只係得把口！

摩佬表示：「史高斯淨係識批評，我唔認為果啲係評論，只係批評，兩者係有分別㗎！普巴一向都盡全力比賽，有時踢得好好，有時踢得好，亦有時唔係咁好。普巴搵錢多過史高斯唔係佢嘅錯，足球就係咁㗎喇。我諗史高斯只會係一位出色嘅球員，唔會係球評家，呢個係我嘅睇法。」

摩佬亦都乘機燒埋其他幾位前曼聯球員果疊，認為加利佬、傑斯等人批評曼聯，係因為佢哋對唔能夠繼續喺奧脫福撈到一官半職失望：「佢哋梗想喺度有嘢撈㗎，但呢個唔係我可以解決嘅問題。如果史高斯有朝一日做領隊，我希望佢有我25%咁成功就好咯。一半嘅話就係12.5隻獎盃，25%就大約係六隻獎盃喇，如果佢做到25%咁好，已經好開心咯！」

--------------------
BFB CHAMPIONS 2.0 新年活動大放送！每日免費11連抽！立即加入 http://bit.ly/2xrTKGM