【新增圖片】
日本NHK電視台年度盛會《紅白歌唱大賽》聽晚舉行，噚日起已安排一眾演出嘉賓參與綵排，可是連日來卻發生意外，連擔任司儀嘅內村光良都不慎傷腳。

松隆子今次相隔18年再度代表紅組出賽，話晒佢都係藝能界阿姐，電視台昨日派出唔少員工，加上傳媒及事務所工作人員都有到場，現場氣氛有啲緊張。不過當松隆子綵排時，一名電視台女職員安排記者到2樓觀眾席期間，遭正在拍攝嘅架空攝影機擊中後腦，呢名女職員當堂暈倒，現場目擊者指當時撞擊聲頗大，十多名工作人員見狀立即上前照顧傷者，好彩呢名女職員隔咗陣終於回復意識，要坐底休息，而一直喺台上嘅松隆子因為現場燈光較暗，完全冇察覺有意外發生，所以其綵排冇受影響。及至綵排第二天，松隆子現身接受訪問，佢提到多年來都冇緣參與《紅白》，今年可算係最佳時機，連其母對佢今屆參與演出都感到意外。

至於內村光良以大會司儀身份拍住有村架純繼續現身，不過佢被爆前日排舞時左腳受傷，導致內村原本跟女子組合欅坂46合作嘅表演環節或要變陣。另外，X JAPAN今日都齊人現身場地，月前接受完頸椎手術嘅YOSHIKI傳出會在盛會上再度打鼓，當被在場記者問到有關問題時，YOSHIKI並冇否認話：「有呢啲傳聞，又或者唔係傳聞呢！」似乎暗示到時會為觀眾帶來驚喜。

更多娛聞，喺晒《娛果》
http://fb.com/appledailyent

【minigame】2017瘋暈人物 返工打機唔使擇日
http://bit.ly/2CeWQkP