《蘋果日報》喺一日二十一日頭版，大字標題，「煤氣減價」，左丁山睇咗，為之醒一醒。於是周圍搵煤氣月費單，睇吓自己交咗幾多煤氣費，結果搵到兩張出嚟，可以做吓比較。
睇煤氣單原來都有啲學問，要計吓數至得。第一張單係二○○五年十一月十四日之前繳費嘅，費用包括首月（二○○五年九月三日至十月三日），次月（二○○五年十月三日至十一月三日）。首月煤氣用量七百六十八兆焦耳，次月用量二千六百四十焦耳（點解增加咁多，尚待查找理由），煤氣標準收費共七百一十三元二角，計番轉頭，每兆焦耳收費零點二○九六元，即二十點九六仙，另有燃料調整費，首月每兆焦耳收六點三四仙，次月收每兆焦耳六點一六仙。

第二張單係二○○四年七月十三日嘅，當時每兆焦耳嘅標準收費係二十點九四六仙，與○五年十一月相差極微，燃料調整費呢？○四年七月嘅價格係一點九八仙（每兆焦耳）。嘩，差好遠噃，與上述之六點一六仙比較，約一年半之間，煤氣燃料調整費增加咗（每兆焦耳）約211%。
用○四年七月嘅收費標準嚟計番○五年十一月嘅煤氣用量，係七百六十六元一角，用○五年十一月嘅收費標準，係九百二十五元六角，即係增加咗20.8%，當然絕大部份係燃料調整費大幅度增加之故。喂，睇番電費單，電費增幅邊有咁高呀！
左丁山唔係投訴煤氣費好貴，而係想講，煤氣公司如果講未來（今年十月）減價，請佢講清楚究竟係降低煤氣標準收費吖，還是降低燃料調整費。天然氣便宜過石腦油，但天然氣價格波動亦唔細，假如天然氣不斷漲價，我哋嘅燃料調整費亦會不斷上升，咁樣我哋嘅煤氣單邊度會有價減呀，唔好太早宣傳減價博好感喎。煤氣公司有度正，就係增加咗燃料調整費逾三倍，冇報紙鬧，冇議員提，正是悶聲發大財，唔怪得股價堅過石堅，長期揸得過。李國寶前幾日咪公開咗資料，增持咗煤氣五十五萬股囉。