《蘋果》娛樂全新節目《關你影視》，結合影評、電影資訊，同你開住Live講戲。啱啱播出嘅第七集，再次請來電影導演郭子健（Derek）做嘉賓。Derek原來一直係cult片迷，對港產cult片尤其熟悉，今次更分享咗好多電影背後嘅有趣故事！

首先一開始，佢就講到近期上映嘅日本熱爆cult片《屍殺片場》，大讚故事非常之聰明，結局又勵志。之後就開始入戲肉，講到一連串嘅港產cult片都考唔到佢，仲分享到監獄血腥作品《力王》嘅故事：「樊少皇係我偶像，嗰時同佢拍戲問好多《力王》嘅細節，當時佢年輕當紮，19歲第一部戲就做男主角，好多打大赤辣打來打去，原來一來無替身，二來無護墊，落地係硬食嘅。」仲話樊少皇：「佢話到而家都唔敢翻睇！」

另外佢又講到大家都好喜歡嘅《生化壽屍》，當年由抱住懷疑心態入場到拍案叫絕：「咁嘅故事，咁低成本，可以有笑、有感動，結局更出人意表，由嗰一刻起直頭當咗葉偉信係偶像。」最後佢就為各位觀眾推介本年度cult片之最：「如果台灣有《台北物語》，大陸就有《逐夢演藝圈》，而我哋香港就有陳勳奇嘅《美麗戰爭》！你必須去睇先感受到故事嘅精妙！」故事講述一個斷腳女生去選美，當中劇情非常誇張：「好離譜，種離譜法係，嘿！如果香港有片商引入，我願意幫大家做個導讀！」就咁聽都覺得吸引。

更多娛聞，喺晒《娛果》
http://fb.com/appledailyent