岺寧兒一連兩場「Nothing Is Under Control Live 2018」 噚晚喺旺角麥花臣場館，圓滿結束，去捧場睇騷嘅除咗有父母岑建勳、劉天蘭，仲有趙雅芝同老公黃錦燊、劉美君、陳潔靈、謝寧等。全場爆滿，岺寧兒出場唱完第一首歌之後，就話：「今晚氣氛幾好喎，呢場其實係你哋嗌出嚟嘅！」原來佢起初只打算開一場，因為反應好，所以加開多咗一場。

全晚表演都好有水準，不過歌與歌之間停頓時，見佢耐唔耐就有聲咳，又不停飲水，佢對觀眾講：「大家唔好緊張，我成日飲好多水，天氣又冷又熱，有少少唔舒服。」

之後準備唱盧凱彤(Ellen)編曲作品《空隙》前，台上樂手同伴唱先退台，舞台燈光轉暗，只有一盞藍燈，backdrop打上「Good Night, My Dear」，岺寧兒就喺一個紛暗環境下唱出《空隙》，伴奏音樂係Ellen生前為呢首歌彈奏嘅結他錄音。唱完後，林二汶出台合唱《銀髮白》，兩個人唱得非常投入，唱完再嚟個深情擁抱，二汶冇講任何說話就離台。

Encore前，岺寧兒話：「相比起六年前同三年前嘅騷，今次有啲唔同，因為我個人大咗，其實自己好想講，我哋好多嘢係nothing is under control,但唔代表everything can be okay,正如好似夜晚，究竟黑夜係有幾長呢？但係大家只要相信太陽係會出嚟嘅，一定會有天光，正如我想唱以下呢首歌叫《信望愛》，希望大家仍然相信有希望，當大家失意時，就要記起呢首歌，大家總會有希望。」

到encore唱出最後一首歌時，現場拋出九個巨型波波，佢叫大家一齊玩，岑建勳同劉天蘭兩個玩得好投入。演唱會結束後，現場觀眾唔肯走，兩分鐘後，岑寧兒獨自出場，佢話：「你哋聽日唔使返工咩？佢哋(樂隊)唔會出嚟彈啦喎！我惟有唱我今朝早一起身諗到嘅歌啦！」跟住清唱《Smile》，演唱會正式完結。

岑寧兒於完騷後接受訪問，佢話上個禮拜都發燒：「今個禮拜仲係有燒，人哋騷前做運動，我就不停瞓，試過瞓廿個鐘，日日都瞓十個鐘以上，只可以用瞓覺嚟加速個病痊癒。」佢仲話到已經盡力去做好今次演出，投入去唱每首歌，好好彩可以好專心去唱歌，雖然冇換衫冇跳舞，但導演處理舞台效果做得好好：「令我可以好專心去唱歌，亦好多謝觀眾咁專心去聽，我知道我啲歌好靜好慢。」

講到等咗好耐至再喺香港開騷，岑寧兒笑言：「或者問下主辦單位會唔會開part II，希望唔好再等六年咁耐，其實上次係三年前，真係等下次出碟再開騷，快極都要等兩三年，所以好開心可以喺香港開騷。」

問到係咪將《空隙》送畀Ellen？佢點頭話：「佢彈㗎嘛！嗰個係佢嘅錄音，rehearsal唱唔到，因為覺得佢唔喺度，後尾轉個心態，其實佢喺呢度，咁就唱到，好似可以再同佢一齊表演咁。」同林二汶合唱完嚟個深情擁抱，係咪因為好感觸？岑寧兒話：「其實每次佢喺度，我就再安心啲，我好珍惜每一次同佢一齊唱歌嘅機會，好難得嘅好朋友，又夾到，大家有合唱歌，可以一齊唱 ，大家又鍾意。」佢仲笑指因為同二汶只有一首合唱歌，所以只可以合唱一首，希望往後可以一齊開騷，唱自己鍾意嘅歌。

Google Play 2018 年度最受歡迎應用程式，請即點擊 http://bit.ly/2FCthz5 投《蘋果動新聞》一票

精選娛聞，喺晒《娛果》
http://fb.com/appledailyent