適逢亞洲賽馬會議在港舉行得如火如荼，大批來自亞洲賽馬聯盟之與會人士，呢晚都有到場睇跑馬，不過第二場馬會卻大出洋相，時廐「正藍旗」入閘後發老脾，令鞍上人貝湯美差啲受傷，最終衝閘走甩要退出。此駒當時唔單止喺跑道上空馬狂奔，仲同儀仗隊「捉衣因」，正一搞串晒個Party，擾攘咗近20分鐘至畀工作人員捉番，結果呢場由「幾叻仔」勝出；而且搞到往後場次全部要延遲，馬會宣佈第三至六場比原定時間延遲15分鐘開跑，第七場延遲10分鐘開跑，而第八場延遲5分鐘開跑，尾場跑完已超過11點，搞到個別電視台尾場直播唔到。