當年今日
關於我們

【巴黎直擊】同期出道Baby釣到曉明 JM扮唔知:我同香港冇聯絡

蘋果日報 2014/03/01 06:00

巴黎leonbaby大禮JM名份收車小鎂封盤

除咗有舒淇、趙薇同賭王四太梁安琪去巴黎睇騷外,仲有另一場IsabelMarantA/F2014/2015時裝騷於當地時間下午三點半舉行。JM文詠珊同桂綸鎂都來捧場兼坐第一行。小鎂話噚晚先到,諗住去歐洲休息下,仲計劃長住。佢話:「其實我一直想放假,而且又喜歡歐洲,之後返內地宣傳《白日焰火》。」小鎂謂未決定個假放幾耐,但都有諗過讀書,又謂想去聖心教堂,因為讀書時曾於那兒許過願,覺得有受保祐嘅感覺,故好想再去。雖然未諗定幾時放假,但小鎂已決定四月去西班牙。

同場嘅JM,備受注目——當然啦,佢昔日好友兼孖公仔Angelababy收到黃曉明份大禮——唔止200萬林寶,仲有名份,呢樣先係最重要,等同幫筍盤「封盤」一樣。今日Baby呢條「收車」即時新聞,有三十幾萬點擊,逾萬人like。唔知幾多係羨慕Baby嘅女讀者呢?

問番JM,點睇Baby收到咁大份禮?JM話:「係呀?我同香港無聯絡啊!咁我祝佢生日!」咁想唔想好似Baby咁收到驚喜?JM話:「咁又唔一定,自己未有一半,女仔收驚喜係會開心,但自己未有一半,所以唔諗一啲不切實際嘅幻想,感情事隨緣啦,依家都係工作為主。」

JM話,今次嚟睇三場騷,好趕,噚日朝一落機就不停工作,冇瞓到。佢話想放幾日,去阿姆斯特丹同朋友玩。談到有傳佢唔同AMusic續約,JM話洽談中,年中約滿。「我有興趣同Leon(黎明)合作,我知佢都喺巴黎。其實我想拍戲,第一意願都係AMusic。」是否覺之前公司唔係開咁多戲俾佢拍?JM話:「每階段都有不同新人,工作嘅嘢睇緣份,能否拍到想拍嘅戲,都係睇緣份。」JM又表示冇搵緋聞男友霆鋒傾呢件事:「五年前都係自己搞掂0架啦!」