當年今日
關於我們

【韓流】朴寶劍、雪炫威威!大學生最想帶佢哋返屋企過年

蘋果日報 2016/02/07 06:00

蘋果香港調查大學生過年Irene即時屋企俞承豪雪炫請回答1988朴寶劍柳俊烈Yerin

聽日係大年初一,拜年係常識,亦都會見到好多十年唔見嘅親戚,而呢啲親戚永遠亦都會好關心幾時輪到你派利是,拍咗拖未,所以要帶一個見得人嘅另一半返屋企見鄉親父老真係好緊要。

近日首爾綜合藝術實用學校向734名攻讀電影、設計、模特兒等課程嘅大學生進行調查,要求佢哋投票選出「最想帶回家過年嘅男女明星」,結果憑韓劇《請回答1988》爆紅嘅朴寶劍同韓團AOA成員雪炫分別當選男、女組別冠軍。

喺406名男學生之中,有113人選雪炫為頭號女神,覺得帶佢返屋企過年絕對唔會失禮;第2名亦落入女團成員手上,由RedVelvet嘅Irene以101票奪得,第3名係GFRIEND成員Yerin。IU得第4,少女時代隊長泰妍第5,反而近期熱爆嘅TWICE成員周子瑜跟同門師姐秀智就五強不入。

男子組方面,328名投票女大學生之中,有109人勁冧朴寶劍,而同佢合演《請回答1988》嘅另一男主角柳俊烈,雖然有新一代「醜帥」之稱,但亦人憑劇貴,殺入季軍位置,而亞軍就由高收視劇集《Remember-兒子的戰爭》嘅俞承豪奪得。第4名係劉亞仁,而呂珍九就排第5位。