冠軍（092）同好多二三線一樣，1年嚟跌咗50%。呢個跌幅算係碎料，但冠軍認真係殘到爆。冠軍啱啱喺月中創1年新低，見0.94元，呢個價位，仲殘過沙士期低迷價0.95元。呢期反彈，現價（0.99元）同沙士價唔係相差好遠。
冠軍最新NAV3.3元，現價折讓上到70%，P/B得0.3倍。同系看通（1059）家陣P/B挨近1倍水位，阿媽冠軍，冇理由咁落後。又冠軍08年半年度（12月底止）純利穩升20%，集團又有祖國市場做後盾，照計全年度一樣好景。就算冠軍全年度純利增長，只係維持半年度嘅增幅，到7.5億銀，08年度預期PE，都係得兩倍。再講，就算好保守計數，冠軍08年度末期息，只係keep住07年度水位，周息率都講緊上6厘水平，又係吸引到爆。冠軍P/B係咁意收窄番到0.4倍，係講緊要升33%到1.32元。

一拖有鑊氣炒一轉

一拖（038）對上兩個交易日，成交股數都超過40球，係半年嚟最大成交兩日，要昅昅。一拖揸現金6.25億銀人仔，等於集團每股淨現金近0.82港銀，係現價（1.89元）43%，呢個淨現金水平，加埋集團係國策受惠股，而唔係宏調受累股，已經夠照。再講，一拖最新NAV3.4元，P/B得0.55倍，環顧全球同業，一拖平咗大截。趁有鑊氣，嚟轉短打，博一拖上番50日線2.49元，現價潛在回報率31%，仲未有耐到NAV水位。