最近西九文化區設立戲曲中心，英文名以國語拼音譯為XiquCentre，有網民笑言發音似廣東話「屎渠」、「私處」讀音。

今日羅家英、蓋鳴暉等人喺港台出席粵劇界十大新聞頒獎禮，家英哥話個名唔影響整體事件，佢話：「戲曲英文我唔識，如果用Opera又唔能夠貼切形容，或者唔好用國語拼音，試下用廣東拼音。不過其實都係得啖笑，有啲人會批評政府，但戲曲界唔會介意，平時內地講唱戲曲都係Xiqu。可能有啲人會話你地梗係碼住大陸，但係10年唔變，40年都會變，慢慢變大家舒服啲。」

蓋鳴暉亦指可能係文字上失誤，唔好太計較，當笑話來睇：「大家互相溝通，搞好巿場就算。」另外，久未演出嘅吳君麗亦有到場，表示雖然間中有人邀請做演出，但暫無考慮，佢表示：「我之前捐晒戲服，所以暫時冇呢個打算。」