【中宣部正式掌控電影】新任政協入主「香港演藝內協會」 配合統戰任務?
中宣部政治任務統戰成龍大灣區
噚日香港影視博覽上,有一個令人注目嘅環節,就係——香港演藝界內地發展協進會(簡稱:演藝內協會)成立。呢個名,夠晒長,夠晒普通,亦夠晒難記。
該會首屆主席,由全國政協委員成龍擔任,再睇下其他理事同會員名單:
副會長 汪明荃 曾任人大及政協 八和會館主席
副會長 譚詠麟 香港演藝人協會前會長
執行會長 曾志偉 廣州政協委員 香港演藝人協會前會長
創會成員 莫華倫 香港歌劇院藝術總監
創會成員 黃英豪 全國政協委員
創會成員 古天樂 香港演藝人協會會長
創會成員 劉偉強 香港電影導演會會長
創會成員 吳傑莊 全國政協委員,全國青聯常委,香港青年聯會主席
創會成員 王祖藍 廣西壯族自治區政協委員
創會成員 謝霆鋒
委員員同創會會員名單11個人,6個有政協背景。今日仲有國家新聞出版廣電總局副巡視員周建東出席。這是否巧合?
成立儀式上,阿姐、成龍同曾志偉都努力解畫,稱「演藝內協會」係為北上發展嘅香港演藝界爭取福利,同埋希望打破配額制。配額制係指,大陸為保障其國家演員同幕後唔會俾「外勞」搶飯碗。依家「演藝內協會」就係話想改變呢個局面。
首先,睇一睇依家「上面」發生緊咩事。習總封帝時代來臨,中共更加要牢牢掌握同加強「思想教育」工作,責任在中宣部上。咁中宣部係做咩嘅呢?就係掌控同宣揚中共意識形態。
香港人成日聽嘅「國家新聞出版廣電總局」將會重組,變成「國家廣播電視總局」,管電視。
噚日中共中央正式發佈一份名為《深化黨和國家機構改革方案》文件,披露以下變動。首先係新聞出版,管理嘅職權歸入中宣部,「貫徹落實中共宣傳工作方針」,包括行政、統籌、規劃、指導同協調,就連監督權都係喺中宣部。球證、旁證、足協、足總、足委,全部都係佢嘅人。
至於電影,據文件所講,都係歸入中宣部,管晒電影行政、監管製片、發行同放映,就連內容審查都係由中宣部負責。至於「協調」全國重大電影活動、合拍片製作,國際合作交流,以及輸入/輸出乜嘢電影,亦權歸中宣部。繼續都係球證、旁證、足協、足總、足委,全部都係佢嘅人。
統戰同「演藝內協會」成立有咩關係?不如先聽下特登拍咗條片「賀」演藝內協會成立嘅林鄭講咗乜:「本屆政府其中一個工作重點,就係深化香港同內地嘅合作,既可以抓住國家進一步改革開放帶嚟嘅機遇,又可以積極參與一帶一路,同埋粵港澳大灣區。咁呢啲發展機遇,當然亦包括香港演藝事業,所以香港演藝界內地發展協進會喺呢個時候成立,真係非常之合適。」
又係發展大灣區。坊間對大灣區簡單理解就係——「換血」,將香港人「換上去」大陸,大陸人就換落嚟香港。由梁振英時代到今日林鄭一直都做緊。大家可以Google一下。
唔單止林鄭咁講,執行會長曾志偉今日喺台上講得更赤裸:「另外有一個最新嘅機遇,大家都要把握,就係國家依家盡力發展緊大灣區,大灣區好多香港人仲唔知係咩,好多年輕人唔知。係喇,係9+2,唔係大口環同筲箕灣,係大灣區。所以大家真係要好好發展呢個粵語市場,咁呢個正係我哋最善長,就係紮根我哋粵語市場邁向國際。」
會長成龍今日喺台上都話講咩:「演藝內協會亦都係我哋幾個香港有心人士,自發性嘅發起,無非就係,我哋可以成立獎學金,俾香港嘅學生可以喺內地同埋各大演藝學系嘅高等學府學習演藝,同埋上課,多學習,多體驗。」而佢今日甫上台,第一句就係:「各位領導,各位嘉賓」。唔好忘記,成龍日前出席政協會議之後,受訪時話過,依家冇香港電影,只有中國電影,仲話拍道地港產電影已經冇市場。
幾條線拉埋一齊,表面上雜亂無章,其實細心一想,「演藝內協會」巧合地有六個政協(人大)背景嘅理事,而全國政協委員兼上市公司香港資源前主席黃英豪、廣西壯族自治區政協委員王祖藍(新任)、全國政協委員(新任)兼全國青聯常委吳傑莊都有份加入,啟人疑竇。
今年係政協換屆之年,不少名人/演藝界人士上馬獲委任,背後關係固然千絲萬縷,但亦有傳,佢哋背後有政治任務,就係「統戰」。演藝界配合中宣部統戰工作,同時亦要配合港共政府「殖民大灣區」計劃。打著協助港人北上發展嘅「演藝內協會」,只係一個開始。
據知,新任政協王祖藍請咗個資深前政治版記者做「文膽」,幫佢發新聞稿,又由對方出馬,同各大傳媒政情版記者打好關係。如此出心出力,可見其任務不輕。
阿姐同曾志偉兩位理事,講講下個會點樣為香港電影界爭取利益同保障,結尾話題一轉,變成講「大灣區」…
聲稱依家已經冇香港電影嘅成龍,獲選為「演藝內協會」主席,代表香港影圈台前幕後北上謀福祉。都幾矛盾。
前排左起:新任政協委員吳傑莊、陳國強、楊受成、莫華倫、政協黃英豪、劉偉強
前排:王祖藍、馬逢國、曾志偉、汪明荃、國家新聞出版廣電總局副巡視員周建東、成龍等等。