昨日港股期指結算，淡友再贏一仗。
港股借花旗股市造好高開，但係唔夠力，啲沽盤好似倒水咁，個市靠兩大銀行股同埋地產股頂住，不過都冇用，因為國內保險股唔生性，係咁插落嚟，影響咗投資者嘅情緒，跟住連啲地產股都守唔住，就出現咗你又沽佢又沽嘅情況，雖然成交只有1050億元，唔算好大，不過成交就係6日以來首日回升，咁嘅情形都好難唔令人有戒心。

花旗昨晚多數都會減息半厘，不過都冇乜用，因為呢個已經係預期之內，睇啲大藍籌昨日沽貨嘅手法，應該係預咗昨晚花旗股市會跌，今日再插過。
平保P輪4919：平保（2318）昨收57.4元，低過上個禮拜嘅低位，沽壓好重，睇個勢會下試52元同46元，可以買啲P輪4919短炒，昨收34仙，有效槓桿1.1倍，正股跌落46元，4919會見43仙，正股升破65元止蝕。