科技股與科網股噚日成為升市奇葩，品質國際（243）與偉易達（303）分別逆市升13.3%及8.3%，主要係因為南韓晶片生產商將晶片價格大幅調高30%，擺明就係科技行業復甦一大鐵證，但晶片價格上升意味電腦科技設備成本可能會上升，對聯想（992）未必係一件好事，但聯想股價都升2.5%。
此外，科網股都齊齊急升，除咗轉型成功嘅Tom.com（8001）勁升逾10%，重上4元之上，尚未轉型嘅新意網（8008）與恒基數碼（8023）亦分別急升11%及20%，相信都係博大霧居多。

715將有大動作
和記港陸（715）最近久唔久就有大盤喺0.50元樓下掃貨，噚日有大盤將股價推高至0.56元，全日升12%。和黃（013）與陸氏家族購回控制權後一直未有任何動作。Cookie話，和黃對隻股有相當大期望，會趁經濟復甦前進行收購。
民營企業近期頻頻傳出不利消息，繼早前格林柯爾（8056）急跌後，歐亞農業（932）噚日又狂跌24%，真係幾得人驚。
講起民企，白馬戶外媒體（100）呢排喺招股價之下徘徊咗一段時間，近期成交已告轉靜，噚日收報5.70元，冇起跌。i師傅話大戶收貨已收到七七八八，差不多係時候做嘢。雖然白馬主席表明自己係港人，白馬係港資公司，不過白馬民企形象已深入股民心，相信等埋啲民企不利消息過去後就會變飛馬。