究竟搵另一半有幾難？原來只要肯搭飛機、去多啲旅行，就有機會了。滙豐最新調查顯示，每50名乘客當中，就有1人喺航機上遇上一生中最愛。

調查列出兩個例子，來自波士頓的Kirsten Marchbank同Adam Naymick，多得航班延誤，令佢哋遇上邂逅嘅機會，拍拖3年後再於航機上訂婚。來自德州的Angela同Jason DeVito，2005年喺航機上偶遇，最後結婚，生埋兩個女。調查提到，6%受訪者曾於航機上遇見吸引嘅人、仲約會過。

點解調查講到航班上認識另一半機會咁高，香港人明明好鍾意旅行，但身邊又少有聽過呢類空中情緣？唔通係香港人比較保守嘅緣故？睇嚟，單身狗的您們，下次要主動啲，快啲撻着了！

航機上發生嘅，唔止係搵到另一半嘅機會。調查提到，有接近一半人（47%）曾於航機上同鄰座陌生人對話；12%人於航機上曾經搵到可以持續嘅朋友關係；有13%乘客搵到良好嘅商業連繫。

當然，航機上亦有令人討厭嘅事發生。調查提及，美洲人最討厭孩子腳踢前座（65%），其次係畀小朋友喺航機上奔跑（59%）、粗魯對待空中服務員（56%）、除鞋發出臭味（45%）等等。

調查顯示，航空業每年帶來經濟規模達到4,005億美元， 每日有1,190萬人於全球乘搭飛機，每名乘客每年平均乘坐4.5航班，喺飛機度過30小時。

全球樓行 Dream House零距離
https://hk.feature.appledaily.com/overseasproperty