當年今日

風流紅星怕黑
馮仁昭四圍超:陪瞓男女各有功用

蘋果日報 2003/09/15 08:00


早兩日同啲導演傾偈,大家講起風流紅星好怕黑,所以佢每次出埠都要搵人陪佢瞓,而好多時去到外地,佢同助手會租兩間房,但聲明兩房係可以打得通嘅,咁佢先敢瞓,不過佢又鍾意召妓,咁叫咗個女仔上嚟後,度門梗係要關埋啦。

趕女仔爬水渠
有時佢驚得滯就會叫醒個助手,叫個助手不如瞓喺佢隔籬張床,所以做佢助手都幾慘,經常俾佢三更半夜嘈醒。
風流紅星又出名孤寒,估唔到佢搵咁多錢都出手咁低。連佢個前女友都話,同佢一齊冇收過名貴首飾,佢個前女友都係有名嘅女星。
話說當年佢兩個同居,有日女星要拍夜班戲,風流紅星帶咗個女仔返屋企搞嘢,點知嗰晚女友提早返嚟,佢驚到要個女仔即刻擒水渠走,幾乎跌死個妹妹仔。

阿梅一人一祝福
梅艷芳公開自己患咗子宮頸癌之後,圈中朋友同fans都好關心佢,有間纖體公司將會於星期六下午兩點鐘,喺銅鑼灣名店廊同阿梅舉行簽約儀式,另外重發起咗個「一人一祝福大行動」,巿民可以去到現場支持阿梅。而林燕妮前晚就話重未問候過阿梅,佢語帶雙關話:「呢個時間太熱鬧,唔問候住喇,鼓勵病人唔係湊熱鬧,成屋幾千人,去嚟做乜?」

河利秀中性打扮引洋漢
韓國變性人河利秀噚日喺台灣出席一個秋冬服裝展,佢一身中性打扮,重話全身上下都係自己襯嘅,但就絕對唔係名牌子咁話。之後佢去咗Room18的士高跳舞,有個外國人走埋嚟搭訕,話要請佢飲一杯,但係河利秀就向來唔飲酒,所以拒絕咗個外國人嘅好意,不過就接受咗個外國人嘅邀請同佢啲朋友一齊跳舞,玩得都不知幾開心。
王敏德叫鄭啓泰行開
王敏德同太太馬詩慧、三個仔女一家五口,噚日喺九龍灣出席「地鐵商場方程式賽車全面睇」活動,王敏德同另一個嘉賓樂基兒輪流坐喺F1跑車度,試玩模擬賽車駕駛遊戲,王敏德連玩遊戲都非常投入認真,司儀鄭啟泰想問佢玩game嘅感覺,點知佢竟然叫鄭啟泰行開啲唔好阻住晒,搞到鄭啟泰鬼死咁尷尬。

Juno日浸五次浴
噚日麥浚龍(Juno)喺奧海城出席一個環保活動,唔講唔知原來Juno好鬼鍾意浸浴,每日重會浸成四、五次咁多㖭!佢話為咗環保,𠵱家每日已經減到只係會浸兩次!
嘩!每日浸四、五次,唔知佢成日着長袖衫,係咪因為浸到皺皮呢?

天佑享豔福最怕Miki
男子組合Shine噚日喺小西灣出席「創意沙沙大晒冷」活動,徐天佑大受女歌迷歡迎,大家爭相上台蹺住佢隻手,歌迷不自覺就冷落咗黃又南。天佑噚日咁有豔福,唔知佢嘅緋聞女友Cookies成員Miki今日睇報紙,見到呢啲相會唔會眼火爆呢?睇嚟天佑噚晚都要攝高枕頭諗定計仔去𠱁番Miki呢!