【鳩嗚乜乜乜】
《大時代》重播大熱,令更多人講起慳妹(周慧敏),費清最記得係佢為咗慳錢,食隔夜餸搞到食物中毒咁滯。話時話,食隔夜餸好多人都試過,究竟點先會有事,點先會冇事?
IVE(柴灣)應用科學系高級講師方麗影,就教大家點做慳妹嘅小貼士。佢話,一般餸菜,可以貯放喺雪櫃內,溫度約為4℃,第2日攞出嚟,再以85℃或以上,將食物翻熱,就可以安全食用。
不過,方補充先決條件係,食用時大家先要講求衞生。譬如,餸菜如果已經放咗喺室溫幾個鐘,又或食用時大家都冇用公筷,咁就都有機會令嗰碟餸菜嘅原菌數量大大增加,從而縮短佢嘅貯放時間。