今日多隻新股齊齊公佈招股詳情，記者會時間撞晒期，要突圍而出真係唔容易。為Dior、GUCCI等多個國際品牌喺內地進行品牌推廣及公關工作多年嘅艾德韋宣（9919）就深明吸引記者眼球嘅技倆，專登請咗女星劉嘉玲嚟記者會做特別嘉賓，仲將個講台搭到做show咁，雖然集資唔夠5億，但氣派搭夠啦。

着上黑色短裙同黑絲嘅劉嘉玲，喺台上力讚間公司，仲話有興趣認購公司股份。佢百忙中畀面出席，莫非同又係姓劉嘅艾德韋宣聯席主席劉錦耀係親戚關係？非也，劉嘉玲話係因為佢同公司公關總經理包一峰識咗廿年，兩人喺金馬獎結緣，力讚鮑一峰做嘢有交帶，當佢家人咁保護，所以佢自己品牌同所出席嘅所有品牌活動，都由艾德韋宣負責。

艾德韋宣招股價介乎1.71至2.34元，一手2000股，入場費4727.16元，預計2020年1月16日掛牌。

有新股招股書未印好

呢頭有新股有備而戰，嗰頭就有新股甩晒轆，唔知係咪十幾隻新股同一時間要註冊招股書嘅關係，港交所似乎應接不暇。好似今日舉行記者會、宣佈招股詳情嘅驢跡同上海建橋教育，都因為招股書仲未完成註冊，搞到去到夜晚6點幾都未能公佈招股詳情。

有賓架話，咁夜都未搞掂嘅情況比較少見，雖然明白係年尾，好多新股一次過出，但估唔到會咁。招股書要完成註冊先可以向外公佈同招股，賓架講笑話港交所開OT都要搞掂佢，唔係嘅話公司唔可以按住個時間表招股，咁就真係多得佢唔少。

李華華