李拾壹今日到商台宣傳新歌《應百客百貨》，首歌好快完成，但MV用咗好耐時間拍，因為搵嚟好多朋友幫手客串，兼且內容係翻拍咗好多大家望到就有記憶嘅廣告，佢話：「好多人顧住睇個MV都聽唔到隻歌，不過唔緊要，MV用黎睇，歌另外聽。」

佢仲話花咗個幾月學成游水，兼且通過渡海泳水試，稍後就要游大約一公里，由文化中心到會展，佢自言有信心完成賽事，但日前經過尖沙嘴海旁，有件事令佢非常擔心，就係海水好臭，而游水難免飲到海水，佢好擔心游水後會有寄生蟲。