昔日一同創立公民黨嘅公民黨主席梁家傑和民主思路召集人湯家驊Ronny，之前因為湯家驊退黨而分道揚鑣，更傳出兩人不和。兩人今日一同出席電台節目，一開咪即被主持陳志雲問仲係唔係朋友，傑哥就話「我當然覺得Ronny係朋友喇」，至於Ronny就引用劉曉波嘅說話，指「我沒有敵人」，不過講唔到兩句Ronny就話傑哥係捩橫折曲，火藥味濃。

今日節目一開始，陳志雲唔係問有關袁國強辭職問題，反而大爆傑哥和Ronny無可置疑唔係同一條線上溝通，事關節目開始前會播放一條新聞聲帶，陳志雲就留意到傑哥用耳聽，但Ronny就用眼睇，即使在同一空間兩個人都係雞同鴨講。

之後，陳志雲就單刀直入，問兩個人仲係唔係朋友，傑哥就話「我當然當Ronny係朋友，我唔知Ronny當唔當我係朋友喇」，而Ronny就話，「正如劉曉波講，我心裡沒有敵人」。傑哥即時反駁，咁係就差啲喇，因為你無任何敵人，所以先叫我朋友；Ronny又話「你咁捩橫折曲，真係虧你係大狀」。雖然把口就話再見亦是朋友，不過聽落就真係句句有骨囉。