新戲泰國取景大延誤
城城、青雲被紅衫軍玩殘

蘋果日報 2010/04/12 00:00


泰國反政府紅衫軍在首都曼谷集會示威近一個月,軍方前日施放煙霧彈、催淚彈及發射橡膠子彈清場,遭紅衫軍激烈反抗,造成嚴重傷亡。寰宇電影公司原定下月初赴泰拍攝由郭富城主演的《B+偵探》煞科戲,並同時開拍由劉青雲主演的新片《恐慌完美童話》,如今受當地局勢影響,兩片被迫押後至下月底才開工,若屆時情況仍未改善,電影公司不排除取消到泰國取景。陳可辛因父母長居曼谷,也特別關注當地新聞,更叮囑雙親避免外出。
郭富城及龔蓓苾主演、彭順執導的電影《B+偵探》全片在泰國取景,電影由寰宇電影公司投資,去年10月在泰國開鏡,今年1月影片拍攝至近尾聲時,因彭順與李心潔籌備結婚,故暫停拍攝工作,電影公司原定下月初在泰國拍攝煞科戲,豈料曼谷政局突然變天,為保攝製隊的人身安全,寰宇決定押後行程,若情況再惡化,不排除改為在港搭景補拍。
empty
最近愛上玩微博的城城連登機照都貼出來與歌迷分享,可惜泰國行取消,不然他應會貼出更多近照。互聯網圖片
empty
城城(右)和譚耀文主演的《B+偵探》去年已在泰國開拍。劇照
或在港搭泰國景補拍
彭氏兄弟一向喜歡到泰國取景,除《B》片外,彭發原定下月也在泰國開拍新片《恐慌完美童話》,男主角屬意劉青雲演出,但受紅衫軍集結曼谷加上軍方清場造成流血事件影響,電影隨時被迫放棄到當地拍攝。投資這兩片的寰宇電影公司老闆林小明昨日表示十分關心當地局勢,他在電話中說:「泰國成日都會有類似事件發生,只不過今次搞到有咁多人死傷,所以情況比較嚴重,我同彭氏兩兄弟都傾過局勢,大家都同意押後到下個月底先至去拍,希望到時情況有所改善啦!」
林小明指《B》片尚欠煞科戲便大功告成,原本後期製作也計劃在當地處理,現在可能會改在香港做後期,林小明說:「我相信彭氏兄弟都會評估風險嘅,如果局勢都係咁危險,依然係咁亂,我會建議佢兩兄弟將兩部戲放棄喺泰國拍啦!《恐慌完美童話》反正未開拍,改去其他國家拍都冇問題,至於《B+偵探》只係ending未拍,真係返唔到去,咪喺香港搭景補拍囉!站喺電影公司立場,一定係先保障工作人員嘅人身安全。其實不幸中大幸係外景隊未去泰國開工前就爆發衝突事件,如果喺嗰邊開緊工先出事,到時仲大鑊,損失都唔知會有幾多呀!」
empty
彭氏兄弟在泰國發迹,故對該國有特殊感情。資料圖片
陳可辛父母長居曼谷
此外,陳可辛的父母長居泰國曼谷市中心,因近日當地局勢嚴峻,他與吳君如均有打電話到泰國問候家人。
君如昨日在電話中說:「我家人喺印度,我啱啱先同Peter(陳可辛)通過電話,佢爹哋、媽咪冇乜事,佢哋都見怪不怪,不過今次死傷咁多人,我同佢都有打過電話去泰國了解情況,建議兩老如果冇乜特別事呢排都唔好去騷亂區,其實佢哋都好少出街,Peter會keep住同家人保持聯絡,多謝關心啦!」
採訪:丁寧
empty
陳可辛父母長居曼谷,陳母曾被拍下與新抱君如在當地逛街的照片。《忽然1周》圖片
話你知
彭氏兄弟泰鍾情
孖生導演彭氏兄弟雖是百分百香港人,但二人曾定居泰國,99年更憑執導的泰國電影《無聲火》一舉成名,贏得不少電影殊榮,包括多倫多電影節外國影評人大獎,為二人在泰國及香港影壇奠定地位,故二人對泰國感情深厚。今年2月彭順與李心潔結婚時,坦承多年前曾與一泰女同居並誕下一女。
彭氏初期到泰國發展以拍廣告片為主,兄長彭順本是菲林調色師,弟弟彭發則是剪接師出身。《無聲火》後,二人又拍攝了一系列《見鬼》電影,大獲好評,女主角李心潔更憑《見鬼》膺第22屆香港電影金像獎影后。而彭氏兄弟製作的電影大多在泰國取景或後期製作,如《見鬼》、《C+偵探》及《風雲II》等。
empty
《無聲火》劇照
全城熱話
狄波拉:希望快啲解決
彭氏兄弟計劃在泰國取景的電影開工受阻,其實不少娛樂圈中人均喜赴泰旅遊或拜佛,故十分關注當地政局。
狄波拉:
多謝關心,我一向都唔喺呢個時間去泰國,好彩都冇朋友過咗去嗰邊,家香港政府都叫人唔好過去住,我成日睇新聞o架,希望件事快啲解決啦。
empty
任達華:
我好鍾意泰國,早年都有喺嗰邊置業,後來樓價升就放咗。我喺嗰邊都識咗好多朋友,有打過電話畀佢哋,知佢哋冇事我都好放心,希望快啲回復平靜。家局勢咁緊張,暫時都唔會過去嗰邊玩住。
empty
王賢誌:
呢幾日泰國有潑水節,本來有幾個朋友叫我過去玩,但我唔鍾意濕咁,所以冇join佢哋。我都仲見啲過咗泰國嘅朋友上facebook,相信佢哋冇事,可能冇周圍去。其實局勢咁緊張都唔係第一次,相信好快搞得掂嘅。
empty
周麗淇:
原本有幾日假諗住同朋友去泰國,但睇電視見到泰國局勢咁緊張,所以取消咗。
empty