韓國天團BIGBANG嘅29歲成員T.O.P今個月頭被爆喺寓所吸食大麻，同場仲有女練習生韓瑞希。

韓瑞希上周五喺首爾地方法院接受一審判決，根據韓國緝毒法，韓瑞希被判處3年有期徒刑，緩刑4年執行，同時要接受120小時嘅藥物治療，並罰款87萬韓圜(約6,000港元)。法院方面指韓瑞希購買大麻同時吸食確實有罪，不過因為佢明白當中錯誤並且進行反省，加上考慮到韓瑞希嘅年紀，所以就判以緩期執行嘅判決。

而根據韓國傳媒報道，檢方因不滿韓瑞希喺上周一審中嘅判決太輕，噚日已向法院提出上訴，如法院受理案件將進行二審。而T.O.P嘅案件就會於下周四進行一審，到時未知T.O.P身體狀況是否能夠出庭應訊。