當年今日
關於我們

哥頓潘再度起飛 - 左丁山

蘋果日報 2004/01/10 08:00


數日前傳出新聞,故事上過《壹週刊》嘅潘東凱突然來電,咦,居然學人講馬噃,問左丁山隻「大唐勇士」得唔得。記得呢隻馬季初贏過兩場,又捧過杯,已經有晒交代,今季重點會苛求呀,隻馬休息吓先算啦。
潘東凱話:「我𠵱家響大唐呀,大唐勇士馬主就係我波士。」哦,馬主就係李德麟,馬主之父就係李和聲,證券界聞人,以前與友人經營「順隆」,後來啲拍檔叫李和聲捱吓義氣,買晒啲股份。點知做人唔怕捱義氣嘅,李和聲買入不久之後,上海首富周正毅就以高價向李先生收購順隆,周正毅出事之後,李先生肯買番順隆,但人哋係要賣畀新鴻基證券,於是李先生父子再買過經紀牌,組成「大唐金融集團有限公司」,專營證券、期貨、黃金、企業融資。世界又有咁好嘅,「大唐金融」一出世,個金市股市期貨就踏入上升軌,生意多到做唔切,淨係做番上海幫都夠晒做啦,所以行運就係行運,冇得拗。
潘東凱原來入咗大唐做「首席投資策略師」(ChiefInvestmentStrategist),至於負責何事,冇問得咁詳細,呢位哥頓(Gordon)嘅投資理論,叻到識飛,以前單打獨鬥,資本不足,大市郁動得太犀利,兼與大戶做對手,咁就中招。以後專係出謀獻策,又唔同講法,分分鐘做番飛俠哥頓,演出連場好戲㗎,且拭目以待。