【銅鑼灣】現年40歲的鄧健泓十年前與原子鏸分手後，可謂從未孤單一個，繼李詩韻、龔嘉欣及07年港姐冠軍張嘉兒後，今年初跟前樂壇女子組合Freeze成員石詠莉合作演出舞台劇《大酒店有個荷李活》撻着，二人前晚拖手到銅鑼灣shopping，鄧健泓全程做阿四，除了管接送包埋單，連拖鞋都幫女友遞埋，似足老竇湊女。
前晚大約7時，鄧健泓駕着其藍色MINI Cooper載女友到銅鑼灣shopping，由於晚上銅鑼灣人流頗多，最初石詠莉一直都只隔兩個人身位，跟在男友後面，直至二人要跑過大馬路到對面街，鄧健泓便出手拖住女友行，本來做跟得女友的石詠莉即時冧爆，邊行邊依偎在男友身邊。

拎手袋兼埋單

鄧健泓比石詠莉大13年，同女友拍拖行街照顧周到，前晚亦陪女友看女裝，女友要揀衫，鄧健泓便幫女友拿手袋，又將女友揀中的衫全部搭在膊頭，完全不介意做阿四。之後二人到家品部買拖鞋，當石詠莉選中其中一對，鄧健泓即時彎腰將拖鞋放在地上給女友試穿，甜到入心的石詠莉撒嬌問男友意見，最後鄧健泓替女友揸fit拿拖鞋到收銀處付款，二人又撐枱腳食西餐後才驅車返愛巢。
採訪、攝影：楊浩賢、陳辰