Kevin Boy李健宏最近推出咗首新歌叫《我最喜愛的YouTube節目》，內容係講佢製作嘅網上整蠱人節目《玩爆你個腎》，新歌近日出咗MV，重搵咗黃德斌做江湖大佬添。MV一開始係KB畀黃德斌成班手下捉咗，黃德斌為咗幫過往畀KB整蠱過嘅人包括薛凱琪、吳雨霏、鄧麗欣等出番啖氣，於是叫手下狂揼KB教訓一番。黃德斌話畀5秒時間KB逃走離開西貢，但最終當然唔成功啦。最後KB誤打誤撞坐上黃德斌嘅快艇，黃德斌就叫KB以後玩《玩爆你個腎》記住要預埋佢o添！

成個MV特別之處係鏡頭一take過，用航拍嚟拍。KB就喺facebook話:「不經不覺，我哋玩爆你個腎已經玩咗六個年頭，由開頭幾丁友，玩到越嚟越多朋友；由開頭畀人鬧小學雞低級趣味，玩到而家不停有人叫我哋繼續加油，原來玩爆你個腎呢五個字經已陪住我哋同好多人成長，能夠得到咁多朋友支持我哋一直咁玩，係好開心感動㗎！

所以，就喺爆腎踏入第七個年頭，我家KB就用佢嘅一首新歌《我最喜愛的YouTube節目》，去記綠一個對我哋好重要嘅Youtube節目，希望玩爆你個腎唔止會係一個節目，而係一種精神，一種大無畏嘅進擊精神，正如呢首歌嘅MV，由一個瘋狂嘅念頭開始，然後召集一班瘋狂嘅伙伴，用有限嘅資源去將呢種瘋狂實踐，希望大家都瘋狂share開去！」