英籍練馬師高伯新前季只贏16Win，上季回升至20Win，今季賽事一半未完已贏13場，畢業上岸應無難度。

踏入2018年，高廐已進賬三場冷Win，先是元旦日（1日）起孖，包括由史卓豐贏11倍的「武術冠軍」，以及尾場由巴度爆23倍「勇霸神駒」，一星期後再由巴度於沙田爆15倍「閃耀駿駒」。

近期高廐出擊馬賽前都有拍跳，全面做工夫下得到回報，預計馬房攻勢陸續有來。後晚（17日）谷戰第六場三班1200米「問鼎高峰」，歷來三捷全配郭能贏同程，今次賽前試閘、拍跳做到足，符合馬房近期搏殺工序，凸顯爭勝決心。

五歲的「問鼎高峰」上季來港服役，季內出賽九仗全部跑入前四名，當中三次贏馬皆於谷草1200米，並由郭能一手包辦。

雖然今季仍未再捷，但頭三仗跑谷草1200米分獲亞季殿，貫徹忠心準繩本色。其中前仗因郭能停賽改配杜利萊，全程走三叠蝕位下，不敵貼欄慳位的「好吉利」及「叫關健康」跑第三，水準不弱。

上場轉程跑1400米，也是馬兒首次「作客」沙田，面對準一班馬「以奇用兵」無意攻堅，負五個多馬位得第八，服役以來首次無獎金可原諒。

「問鼎高峰」相隔接近兩個月再跑，賽前操練完整，上月30日由郭能出試谷閘，及至埋門再安排拍跳，備戰工夫可謂空前積極。

今次返主場續配最佳拍檔郭能，重現贏馬方程式，有力重開勝利之門。