應屆港姐冠軍雷莊𠒇(Juliette)、、亞軍何依婷及季軍黃瑋琦今日喺將軍澳見傳媒，勇奪最上鏡小姐同冠軍Juliette，被問到噚晚點樣慶祝？佢話：「其實噚晚都冇乜時間慶祝，因為我哋做完個騷，就要去影相，影完相都好攰，跟住就返酒店見媽咪、Daddy，同佢哋傾偈傾到(清晨)五點半，六點先瞓覺，瞓咗兩個鐘。(之後都開始忙㗎喎！)係，我知道，咁我哋忙啲係正常嘅，因我贏冠軍，好開心。(有冇留意到網民嘅留言？)冇呀！我連瞓覺都冇時間，所以我都未有時間go on mind，不過我知道有好多Different嘅意見啦，咁...其實呢啲我都冇乜理，不過我知道地球咁大、咁多人...都please唔到嘅！一定會有different嘅意見。」

講到接唔接受網民嘅批評，Juliette笑住話：「我不嬲都係一個人，都有自信心，所以我自己都會開心，一個人如果冇自信心，又點會開心呢？其實呢啲嘢，網民嘅說話，我自己都覺得好笑，我知道我愛自己係最重要。咁我就唔會理㗎喇！」另提到網民又針對哨牙，佢即話：「咁可能笑容係大啲，咁我噚日笑得好大，因為贏咗冠軍吖嘛，咁就笑得大啲，我覺得冇咩需要箍牙呀...冇咩要整嘅嘢囉。」

記者追問佢係咪好滿意自己，Juliette即話：「自己鍾意自己就得㗎喇！哈哈哈。」對於有網民指賽果不公，「校長」鄭裕玲有兩票投選冠軍一事，佢即話：「咁其實係一個principal嘛，其實今年評判佢哋個final decision，我覺得係公平嘅，因為如果係俾觀眾佢哋揀，係有少少bias同public value，評判係會睇得出嗰啲有potential，所以我覺得佢哋係professional，睇得出係公平嘅！」

記者提到有人覺得冠軍能夠取勝，家庭背景係主因，Juliette聞言即大聲笑住講：「其實一出咗呢個news，直接打去問daddy，問daddy你係咪有啲嘢未同我講呀，我唔知道你係一個富爸爸喎！點解我要咁辛苦，自己俾大學學費吖，其實係錯嘅(指家境富裕報道)，我哋係一直都笑緊，其實人人都希望我哋嘅living standard會好啲，咁所以我哋都講，如果記者咁講，佢哋都睇得出我哋嘅夢想係咩嚟㗎。」問到其家人可接受，佢話：「佢哋少少驚囉！驚被追訪，都驚上鏡嘅，但我贏咗冠軍，都預咗會抄一啲資料，所以佢哋都有準備。」

造馬之聲四起，Juliette話覺得三甲好好嘅，佢認為評判係睇得出佢哋嘅potential，佢再重申唔會介意網民嘅留言：「自己愛自己係最重要，你鍾意自己，第二啲comment，我希望我嘅正能量可以影響到更多人有信心，我喺加拿大嗰邊，留意到香港有好多男仔、女仔都好negative，所以我想鼓勵佢哋要有自信心，要開心啲。」