新世界鄭家純噚日親征立法會，交代聘請前高官梁展文嘅來龍去脈。官商勾結搵食果然唔簡單，立法會文件披露，喺斟數加盟新世界中國過程中，幾個人餐餐大茶飯，唔熟唔食。
新世界梁志堅透露，07年10月佢同九倉黃家耀、恒地黃浩明相約梁展文去中環萬邦行馬車會所食飯，佢輕描淡寫形容只係食餐晏仔一般社交聚會，至於食咗乜嘢，有冇「利益輸餸」，佢冇講。馬車會係私人會所，梁志堅係創會董事之一，另一董事蔡德河同純官一樣，都係民建聯監委成員。原來係自己友地頭，怪唔得曾鈺成近期以立法會主席身份輪流請各黨派議員食飯，都係設宴於此。呢度係民建聯飯堂，民主黨人可能水土不服，張文光食咗西米布甸肚屙，不足為奇。

精挑餐廳方便密斟

梁展文同梁志堅另一搵食地方，係置地HarveyNichols間餐廳，呢間餐廳以靜局聞名，燈光昏暗，侍應又識做唔會隨便打擾客人，有人話係密斟好地方。對堅叔而言，呢處勝在就腳，位於中環新世界大廈對面，過條馬路就到，而梁展文願意移船就磡見面，可見誠意十足，瓜田李下之事，唔理得咁多喇！
飲茶灌水兩次，終於生米煮成熟飯，純官08年5月透過中間人鍾國昌約梁展文去灣仔君悅間鹿悅（Kaetsu）食日本菜。鹿悅出名懷石料理，內部裝修由名設計師JohnMorford負責，深褐色主調典雅雍容，仲有自成一國嘅貴賓房，素來係名人飯堂。純官咁大手筆，梁展文嚟到亦唔同你客氣，好大胃口嗌價400萬元年薪。

冇大茶飯仲有長糧

呢餐大茶飯梁展文本應食硬，但佢獲批准加盟新世界中國消息公佈後，輿論譁然公眾震驚，高官驚覺容許佢幫新世界打工有問題，急急向公眾道歉，梁展文亦要漏夜自我了斷唔做呢份工。眼見米已成炊都冇得落肚，飯到嘴邊亦啃唔落，但唔使慌梁展文會冇錢開飯，因為佢仲可以幫其他公司打工，而且佢在位時已捧住一隻含金量甚高鐵飯碗，退休後亦可以個個月咬長糧，相比起好多打工仔，點睇佢都好有米。
mailto:[email protected]