張崇德、張崇基同埋歐陽妙芝，今日帶埋囝囝喺九龍灣出席《爸爸去哪兒》大電影親子優先場，內地節目《爸爸去哪兒》熱爆，張崇德話都有信心同囝囝參加呢類節目，因為囝囝都係佢一手湊大。

問佢如果內地節目《爸爸》添食，會唔會自薦演出？佢笑住話：「佢哋揀架喎，幫我引薦丫。」佢又話囝囝通常跟佢，囡囡就跟媽咪扮靚多。

講到張崇德囝囝夭折單官司點樣？佢話今朝都去咗醫委會，終於有終極結果，今日係最後一日聆訊，5月11號會有結果，問佢擔唔擔心？佢話：「唔擔心，咁多年都嘗試解釋好多次，今次係為社會做啲野，當日覺得有啲懷疑，因為我唔識醫學，依家令市民關注已達到目的。」

張崇基話自己都有親手湊囝囝，不過細佬（張崇德）梗係經驗豐富過佢，佢又話依家囝囝已有主意，要慢慢同佢溝通，同埋要放好多心機喺佢哋度。

歐陽妙芝今日帶同8歲半同6歲囝囝出席，佢話之前同囝囝、老公一家四口，去咗馬爾代夫玩五日四夜，佢話今次對老公都係個挑戰，仲親手整咗杯麵佢哋食，囝囝都讚好食，佢話：「平時爸爸好忙，成日冇時間喺香港，今次都增進咗感情，返香港時，囝囝仲好感觸話唔想返港，因為知道爸爸又要返工。」

妙芝又笑話教囝囝勞力唔緊要，勞心最緊要，以前爸爸地位低啲，呢幾日相處後地位都高咗。