孫耀威同葉芷如合作嘅慈善電影《我們的6E班》，以青春校園為主題，並將於後日（21日）上映，日前佢哋喺尖沙嘴接受《蘋果》專訪，由於呢套係慈善電影，佢哋表示自願減片酬去拍，望能為種族共融出一分力。

片中兩人飾演老師，孫耀威更化身成「港版麻辣教師」，主理一班問題學生，佢話：「呢間學校有唔同種族，有尼泊爾、菲律賓、印尼、內地新移民，本身佢哋嘅家庭有好多問題，返到學校就有更多種族矛盾，例如校園毒品、黑社會，迫良為娼、家庭破裂，我呢個麻辣教師捉住新老師葉芷如入火坑，拯救呢班後生仔。」孫耀威指有場戲係講學生被黑幫追，佢因為救學生而令手指公骨爆裂，太太陳美詩咪好擔心？佢話：「係呀，佢睇到喊，都心痛，我就肉痛，不過拍打鬥戲就一定有。」

呢兩位老師嘅作風似乎幾另類，葉芷如話：「其實我初頭都唔同意，點解要同學生咁friend？點解仲要同佢哋打籃球？但係見佢用嘅方法可以令學生變好咗，我就慢慢被佢帶住行。」

孫耀威指劇情正正反映到現實，香港有唔少種族，好多人雖然喺香港出世，但有香港身份證，但問題出喺佢哋唔覺得有香港嘅身份，覺得社會唔屬於佢哋，因而令到佢哋冇自信，佢話：「我有個大學女同學，後來做咗校長，10幾年前，因為冇咁多學生，所以學校預備要殺校，佢就開始接收一啲唔同種族嘅學生，開頭真係一鑊泡，但佢去了解呢班學生，佢哋錯，唔好即刻鬧，要入佢哋世界，逐個教，呢個係好好，所以我有向佢偷師。」吸收呢啲個案經驗，係咪對佢將來做爸爸好有幫助？孫耀威笑住話：「我一定做慈父多敗兒，如果個仔鍾意打機，我會陪佢打，o依家後生仔有自己諗法，世界亦都變咗，我會尊重佢嘅個人喜好，我一定唔係怪獸家長，老婆一定要做壞人。」

採訪：黃曉妍
場地：美麗華酒店

孫耀威
服裝：tuxee.co
髮型：Sunny Yu of Hair Culture
化妝：江中平化妝室