由吳彥祖主演，馮德倫監製嘅美劇《荒原》第二季(Into the Badlands)將於下月19號喺美國首播，由於第一季反應相當理想，所以劇組對第二季都相當有信心，繼日前公開首條預告片後，近日又再公開最新劇照及花絮照。

去年做人夫嘅馮德倫婚後即要飛到愛爾蘭開工，佢喺現場細心同演員講解拍攝流程，相當認真。佢話：「呢場係拍攝一場非常重要嘅文戲，吳彥祖亦身在其中，我們租咗都柏林一個好有名嘅古蹟，再喺裡面佈置，我身後嘅油畫就有兩層樓高。」為咗保護古蹟，現場所有工作人員要穿上藍色鞋套，以免弄髒場地。

今次馮德倫除了擔任監製外，亦擔任其中兩集嘅導演，當中演員方面亦多咗荷李活實力派演員Nick Frost同Stephen Lang，馮德倫：「今季整體上更著重劇情，變得更有張力及緊湊，因為重要角色喺上季已出現，今季唔需要再介紹，可以推快全劇的節奏。」馮德倫坦言今次好有壓力，亦希望收視同口碑繼續理想，咁佢就可以有機會繼續拍第三、第四季。

而吳彥祖喺新一季中繼續不乏動作戲，由於佢一身戰士造型就係好鬼有型，所以被網民封為「最靚仔戰士」。