話說旺角行人專用區被封街後，一班以往係嗰度唱歌嘅大媽轉戰尖沙嘴，搞到附近商舖老闆好煩，而係2014年佔旺清場後，響應時任特首梁振英呼籲市民到旺角區消費，而一直留守旺角行人專用區嘅「鳩嗚團」，佢哋都要轉移陣地，不過就係走咗去勞工處「維權」，要勞工處幫手搵梁粉作家屈穎妍攞料，幫佢哋追討100萬「欠薪」喎！

殺上勞工處求助

點解會關屈穎妍事？原來屈穎妍早排係專欄寫，話鳩嗚團收錢鬧事，仲講到有晒價目，「開工300，鬧事500，鬧警察800」，不過成篇文冇提任何實質理據支持佢嘅指控。
「鳩嗚團」就捉住呢樣嘢，噚日十幾個團員走去勞工處示威，除咗話好不滿屈穎妍係專欄屈佢哋日薪有300至800元不等之外，仲要求勞工處向屈穎妍查詢資料，協助搵出連佢哋都唔知嘅「幕後金主」！
鳩嗚常客錢寶芬同八方講，佢哋每日去旺角爭取真普選都係完全自發，冇收取任何資助，完全係「有汗出、冇糧出」，而鳩嗚團員喺旺角已有1,349日，如果用屈穎妍寫嘅日薪800元計算，收入肯定已經超過100萬港元，因此期望勞工處向屈穎妍索取資料，協助鳩嗚團員「追討欠薪」，又要求處方14日內回覆喎！不過唔知勞工處又敢唔敢問屈穎妍呢？

李八方