土瓜灣傲雲峰重推，會所用咗一億元增值，新設施當然要公諸同好。噚日率先介紹「JingleJungle寶貝綠林」主題會所，由於設計概念嚟自熱帶森林，所以請嚟兩隻好精靈嘅馬騮仔做傲雲峰大使，佢哋一男一女，分別叫做Joe同Joey。
發展商之一嘅長實特別整咗本畫冊，介紹會所設施，準備開放示範單位時，送畀小朋友。主題會所嘅設施造型都好特別，好似河馬賽車城，將遙控車場設計成巨型河馬口，重有啲立體布置，例如棕櫚樹、鱷魚先生橋、擺滿卡通人物嘅洗手間，務求令參觀者有如置身童話故事嘅感覺。
要令到大人細路都鍾意個會所，發展商特別度咗啲益智課程，喺啟智樂園，會有導師教琴同埋教上網，可以一邊玩一邊學嘢。

美聯跑到數華置請食晏
華人置業同泛海集團合作嘅豪宅東半山肇輝臺8號，示範單位開放唔夠一個禮拜，重未公布開售詳情，但市場反應熱烈，四十八個單位，已經有近半獲預留。美聯執行董事陳坤興話，該公司佔咗十宗，率先可以跳bar，攞到最高嘅2%佣金。
美聯助理區域經理劉文華補充，買家通常預留一個單位，最多都係兩間。佢透露，每間代理行做到八個單位至可以跳bar。華置助理董事凌緣庭日前同美聯主管食晏，表揚佢哋嘅成績。
肇輝臺8號獲預留嘅單位，呎價由四千六百至六千八百蚊，價錢最平都接近一千一百六十九萬，最貴嗰間就要二千零九十萬。
另外，講開豪宅，富豪酒店嘅赤柱富豪海灣，市傳獲買家一口氣掃入超過十個單位，估計涉資逾三億元。