牌照委員會將喺禮拜五(8日)審視下季騎練牌照申請，現役全體練馬師基本上可以順利過度，但若告達理同李易達喺煞科前贏唔夠16場頭馬，下季就會少兩個練馬單位。騎師方面，預期亦唔會有乜驚喜，好大機會原班人馬，或者有一個半個新騎師，大幅換人就唔使旨意。

早前一直傳韋達下季會掛靴出任大摩副練，隨住十三少親口否認掛靴，並且已經入紙申請下季全季公司騎師牌照，傳聞亦告一段落。話時話，自從疑似被嫌棄年紀大跑長途唔夠氣，十三少近排陣上表現真係醒神番好多，啱啱日馬就貨真價實贏場長途2000米，講多無謂，都係行動最實際。其實十三少仲有好多擁躉，唔奢求你仲係盛年時嘅贏馬機器，只係想你騷返啲搏殺鬥心，馬迷都已經收貨。

大部份騎師都有入紙申請下季牌照，據聞唯獨貝湯美遲遲未有行動，仲未決定繼續留低定返祖家澳洲發展，湯美仔最終有冇入紙好快有答案。始終香港賽事獎金高，騎師唔使穿州過省出賽咁頻撲，受僱做馬會騎師更加有宿舍等優厚福利，貝湯美今季成績強差人意，多少因季初開壞個頭影響信心，若果冇家庭理由，相信佢下季仍然會選擇留低。

至於本地騎師中，續牌最高難度嘅自然係吳嘉晉，上次賽事騎隻「問鼎高峰」又被競賽小組抽秤，小組仲告誡佢要注意近排已多次被關注策騎方式。平心而論，嘉晉仔騎親都係冇乜機會嘅馬，咪講話贏馬，想跑四四五五賺番啲獎金都難。唯一欣慰應該係師傅告仔繼續支持，上場由佢贏開嘅「多項領先」唔只保住帥權，今晚(6日)更抽到黃金一檔，希望佢可以贏多場增加續牌籌碼。

阿Joe