兩會下星期五喺北京開幕，政協委員每年都向北大人提出唔同意見，今年應該以蔡冠深嘅建議最騎呢，事關佢噚日同傳媒飯局時提到，建議中央容許港人可以選擇攞香港身份證或者要國內戶籍，等大家可以購買A股。佢仲引述港澳辦主任王光亞讚佢，話包括呢點在內嘅幾項建議「有創意」同「值得考慮」。

不過，唔少政界中人揶揄呢個建議無可能，質疑蔡冠深唔知乜嘢叫河水不犯井水咩？直指咁樣等同斷送一國兩制。
另外，立法會下周三大會審議2012年立法會同特首選舉條例，由於泛民陣營提出唔少修訂，保守估計至少要開兩、三日會，成班身兼立法會議員嘅人大同政協都準備缺席開幕禮。政協委員林大輝仲預訂咗兩套機票，假如會議下星期四晚完成，就漏夜走人。
有政界中人透露，身兼港區人大代表嘅自由黨主席劉健儀，早前已笑笑口同泛民主派嘅人講咗，當日大會將「奉陪到底」，唔會因為要北上開會而缺席投票。