上月曾發起九巴車長罷駛行動的女車長葉蔚琳一夜成名，成功迫使管理層承諾跟進訴求，身為「月薪車長大聯盟」發起人的她直言外界反應是她意料之外，「監獄都有太平紳士聆聽訴苦，雖然一絲曙光很微弱，但也有希望，你連希望都抹殺，感覺會很絕望，你就會變得愈來愈強硬」

發起行動主因是觸及她切膚之痛，去年曾因鎖碎事情而被乘客無情襲擊，她憶述：「當日我只係做手勢示意讓朋友架車埋站上落客，但乘客就鬧我只顧傾計，但其實根本無開窗，然後話要投訴我，又用手機近距離影我塊臉，我阻擋他，他就一拳打我手臂，但最終上庭有律師幫佢脫罪，我好無奈，唔明點解返緊工會被人打。」

被咒罵去死

她亦曾試過遇上大塞車，苦等良久的乘客習慣性將怨氣發洩在她身上，被人經常以粗言穢語咒罵，「發生咩事都屬於車長責任，試過有人問，係咪所有司機死晒？！我答係，死剩我一個！忍係無可厚非是對的，但太過份就要俾對方知道唔可以咁。」

撐立法

坊間提倡設立《辱警罪》，葉蔚琳亦大表贊同，並指也應立法保護司機免受滋擾及襲擊，「連最高權力的人都無形象，被人連環粗口責罵，你鬧佢會影響佢情緒，警察開槍射人就大件事；延伸至社會上，人與人之間根本需要尊重，缺乏尊重咩道理都係假。」

她剖釋市民怨氣爆煲的主因是住屋問題成最大關鍵，「依家連住劏房租金都要約六千，點頂呀！人點會有快樂，置業後收入大部份都要供樓，每日食飯都要計算住，好慘！點解咁多情緒或不滿，你試想像一下，一個人每天蝸居在七十呎單位內，呆左一日，出街就引爆了。」

葉跟同任職車長的現任丈夫劉卓恆在2016年結婚，她坦言慶幸無供樓壓力，二人居於公屋，月租千多元，「九巴好多卧虎藏龍，有人為左申請公屋，原本時薪幾百元的數學補習老師，都為左申請公屋轉行做司機；有些人經常請病假，就係怕收入超標而影響輪候公屋。」

秋後算帳

「其實今日不辭退你，一年後也可能辭退你，現取決於公司覺得我們所做的事情，希望雙贏局面還是搞事。」

至於有否擔心被列入同業黑名單，「一定會，但我深信十個老闆唔好，總有一個好，可能佢聘請到我是一份光榮，良心企業的標誌，呢個人都夠膽請，因為根本就係對員工好，怕咩？」

最壞打算　重操故業

「我可以返戲曲做下欄，化妝後只需要站立，最低工資都有四百五十元，講兩句對白酬勞更多；我丈夫亦可轉行揸的士。」她娓娓道來唱戲曲的原因，「我以前只係業餘唱粵劇，後來聽朋友提及政府打算推行小班教學，每間學校需要將中國戲曲列入課程，需要大量老師，所以我三十多歲才加入演藝學院，但並唔係為左戲行發展，目的係為了一張證書，讓我可以教導小朋友。」

她認為人生起跌，最重要是看得起自己，不在乎職業高低檔次。

上天賜予任務

罷駛行動讓她領略世間的人情冷暖，上班期間收到不少市民祝福，為她打氣，「好多年青人叫我加油，比心機，最搞笑係叫我呼籲興建更多公屋！」亦有同事淚流披面送上道謝，感激兩夫婦的付出，「同事話行動不在乎結果，有人肯講出重點已難能可貴，夠能獲得支持，你會覺得好值得，你話人生幾時先可以咁做！」

撰文：艾馬
攝錄：陳柱森