當年今日
關於我們

隔牆有耳:689蕉呼 奶媽跣住登基
民主派:酸到出晒面 - 李八方

蘋果日報 2017/05/26 00:00


當選特首兩個月嘅林鄭月娥民望回升,風頭力壓夕陽特首梁振英,但佢嘅添馬登基路卻蕉皮處處,擱置小三TSA同重開公民廣場,CY急急say no,同時冇得跟一帶一路團同去大灣區考察,近日CY更急推郊野公園建屋研究,點解林鄭由CY「第一打手」變成「第一被打手」,白鴿黨尹兆堅有獨到見解:「你(林鄭)影響到佢、睇你唔順眼,咪打你囉……朋友或敵人,一念之間」。
empty
擱置BCA被拒 冇份去大灣區
到底有咩蕉皮?等八方數畀大家睇。嗱,政綱中提出擱置「基本能力評估研究計劃(BCA)」(前稱TSA)嘅林鄭,當選後兩日即出招喺電台稱爭取今年中擱置小三TSA,CY卻同日極速落閘,表明現屆政府唔變,阿尹話呀:「過往好少係咁,佢兩個係前同事,到最後卻一啲面都唔畀,一盆冷水淋落嚟,塊蕉皮跣到佢(林鄭)攤攤腰。」
4月中當不同黨派呼籲重開公民廣場,呢點林鄭競選時話考慮,CY卻聲稱考慮安全問題不宜重開,阿尹對CY放呢塊蕉皮好不解:「就算驚好多人嚟請願,如果林鄭肯做,你點解要阻佢呢?」
再到近日CY帶團赴京出席一帶一路論壇及到大灣區考察,林鄭統統冇份,「有乜理由咁大型嘅規劃,未來揸fit人會被排拒,CY就帶隊上去耀武揚威?好明顯係跣咗林鄭一鑊」。CY上周四仲宣佈邀請房協研究喺兩幅郊野公園邊陲地建屋可行性,尹話CY似乎要將建議當成既定事實,迫使林鄭新政府跟從。
點解CY連環放蕉皮?阿尹話原因或有二,「可能佢好鍾意葡萄,酸到出晒面;或者都好鍾意辣椒,鍾意同人鍊」,而亦因為CY身任政協副主席,「可能都係想耀武揚威,兼且唔認衰,覺得自己官運亨通,呢啲咁嘅嘢(帶團),幾時輪到你啲妹仔做?」
其實人人都好驚林鄭會變成「CY 2.0」,阿尹當然都驚啦,佢寄語林鄭唔好學CY咁好鬥,要守規矩,依法辦事,「例如啲鄉紳支持你,都唔好喺棕地上鬆章,UGL事件都一樣」。
【議員寄語777】
公民黨陳淑莊:冇可能叻晒
「梁振英嘅缺點,佢(林鄭)未必有晒,但係剛愎自用,佢似乎好有條件做得到。我希望佢記緊,一個人冇可能叻晒所有嘢,自以為是只會令真誠嘅意見冇被接納,我希望佢可以虛心咁聽民意,做番一個真正走落區聽民意嘅特首。」

專業議政葉建源:勿好勇鬥狠
「CY 1.0嘅路線,最標誌性係好勇鬥狠,我希望林鄭唔好學佢咁好勇鬥狠。點解梁振英好勇鬥狠?因為佢一路向西,要倚靠西環來幫助……如果將香港當一個戰場去諗,以好勇鬥狠方式管治,就會搞到香港過去幾年飽受撕裂、對立之苦。」

工聯會麥美娟:工作盡早做
「CY喺任期尾先嚟推出不同法案,包括醫療,房屋、爭取取消強積金對沖,點解人哋係歲晚收爐,早啲收工,CY就好似收爐前落雨收柴,趕住『嗱嗱聲』攞晒啲法案出嚟?我希望林太上任後,要做嘅工作盡早做,唔好等到任期最後一年先做。」

民主黨許智峯:對佢冇期望
「我最唔想佢好似CY咁樣一路向西……有人話林鄭嘅性格唔係好容易控制,但我唔信,一個靠中央任命,靠中央欽點先至當選到嘅特首,佢最後做得幾多掩飾都好,佢都係向住西環……我對佢係冇任何期望,始終都係欽點特首,都係會向西。」
資料來源:《蘋果》資料室

李八方
97年主權移交至今,香港前進還是倒退?「蘋果」與你細數廿載風雨。
【回歸二十年】專頁: http://hksar20.appledaily.com.hk