沈震軒因為唔滿意被大台操控，所以選擇離開大台發展，近排佢終於有新歌喇！

沈震軒今日喺銅鑼灣舉行新歌《打不死》發佈會，話時話佢已經好耐無出新歌，所以佢都好激動，現場見到佢阿姨嚟撐場，仲用手機直播俾佢喺加拿大嘅媽咪睇，可能真係太耐無作品，一開始沈震軒已經忍唔住喊，連阿姨都喊埋一份，場面真係幾感人，之後佢就用結他自彈自唱新歌，記者第一時間恭喜佢終於解凍，佢話：「好多時候一間公司去另一間公司都會有呢個階段，自己都係面對呢個階段，呢首新歌都係替自己講小小嘢，覺得自己以前過份沉默，嗰啲花弗，雪藏，自己唔講，就覺得我係，以後我都會表態一下，雖然男人係頂硬上，一啲都唔講係唔得，我會用音樂反映，由細到大爸爸教我小說話多做事，不過唔可以太過唔講嘢，咁樣會有距離，好似工作上，會快啲再出歌，試寫曲同填詞，離開TVB，想多啲電影發展，好感謝太陽娛樂幫我出歌，拍MV。」

之前有傳老闆洗米華覺得沈震軒形象花弗，所以要雪藏佢，佢解釋話：「無澄清就覺得我係，根本就冇呢件事。」咁樣係咪唔敢拍拖，佢話：「我冇唔敢，不嬲都係人揀我，我揀人，有喜歡嘅人，希望低調啲，希望對方快啲成為我女朋友。」沈震軒仲話自己其實係好老土，搞十幾日，都無講一樣嘢，問佢意中人係咪圈中人，佢冇否認話：「我希望保護呢段戀情，我怕會食檸檬，我會加油，之後如果大家見到，我唔會否認。」